Ziad Concert Review

Ziad

 

 

 

 

 

مصدر الصورة: https://www.facebook.com/alshaab.yourid.ZiadRahbany

بدّي علّق ع زياد الرحباني (الله ينجّيني)

هلّأ خلّينا نحكي جدّ. بعد نطرة 3 سنين لأرجع أحضرله حفلة، حسّيت حالي مبعوص (و إيه  3 سنين، لأنّه حضرته بالأمريكية مع تشارلز دايفيز وما صرلي أحضره بالأونيسكو قبلها لأن ما لحّقت البطاقات.)

حسّيت حالي مبعوص مع أنّه مش دافع أكثر من 25000 ل.ل. وكنت حضرت آخر حفلة (بالأونيسكو، نهار السبت). هلّأ رفيقي قال لي “خيّي منيح اللي صرلنا نشوفه للزلمي عآخر لحظة، وأصلًا هيدا اللي بيطلعلنا ب 25000ل.ل.”

أنّو إي توفّقنا بالبطاقات بعد ما توفّقنا بحدا يساعدنا بواسطة من قلب الأخبار ليحجزهن بالغلط، خاصّةً أنّه العالم خف حماسها بعد 5 حفلات ما طلعلنا نحضر ولا واحدة منهن لأنه ما كنّا منعرف حدا بالأخبار أو بالحزب ليزبّطنا. وقول منيح اللي ما رحنا عالحفلات اللي قبل، لأنّه بعصة ب 25000 ل.ل. أهون من بعصة ب 60000 ل.ل.

وبس لوضّح أنّه المصاري منّها مشكلة لأنّي كنت مستعدّ روح عالحفلة ب60000 و 75000 و 90000 (مع أنهن ما قنعوني بالأوّل أنو ممكن يكون زياد فعلًا عم بيعزف ب هل أدّ مبلغ، بس هيدا حديث ثاني) لأنّي كنت متوقّع شوف وأسمع شي غير اللي شفته وسمعته.

عندي كم سؤال لزياد شخصيًّا (ويا ريت ما تبخل علينا فيهن، لأن هودي مش صور)

أولا: أنت كيف بتنقّي العازفين يا خيّي؟ على شكلن؟ ولّا كمان هون بتشتغل معك الواسطة؟ يحرق عرضن، ولا واحد مارق حدّ الجاز بحياته شكله؟ (شيل الساكسوفون ع جنب لأنّه الوحيد اللي بيفش الخلق، و هه يعني). أنت قبل غيرك لازم بتعرف أنّو الجاز أحساس قبل عزف النّوتة، وأنّه حفلة الجاز مش بس عزفنا المقطوعة صح ليصفّق الجمهور. هي كمان العرض اللي بيعملوه العازفين بأداءهن وحركاتهن عالمسرح واللي بيحمّس الجمهور وبيعطي رهجة للحفلة. وخاصة أنّه، هلّأ ما بعرف إذا كنت عم تجرّب تقدّم فرقة بيغ باند (Big Band) أو شي منّه لاونج (Lounge)، وعالحالتين العازفين ما خصّهن بالاثنين. لك بشرفك جايب هواة؟ ولّا عازفين كونسيرفاتوار(Conservatoire)؟ ولا والله عازفين الكونسيرفاتوار أحسن من هيك، حضرت لهم حفلة بيغ باند وكانت حلوة، وعزفوا مظبوط، و نسّقوا منيح، ومع حماس.

أمّا المغنيات، كل هالفرقة اللي كانت معك، ما كنت تعرف تجيب مغنّيتين زيادة؟ يعني كل واحدة واضح أنّو إلها مجالها، ليش خلّيتهن يغنّوا شي ما خصّهن فيه؟ الصبايا صوتهن حلو، كثير حلو، ما عم نقول لأ. بس خلّي اللي بالعربي بالعربي واللي بالأخنبي بالأجنبي. ليش مصرّ تفرجينا ضعفهن للصبايا؟ جبلك مغنّيتين زيادة عربي وبلا هالبهدلة.

يا خيّي إذا ما بتعرف عازفين مناح وعندهن إحساس، أنا بعرف، فيني اتوسّط لهم معك؟

يعني منيح اللي بالحفلة كلّها كنت أنت اللي ماسكها  وعم تمرّق سولويات حلوين، ومنيح اللي كانت هالصّبيّة الحلوة بالفستان القصير أبو شريطة زهر اللي خصرها بيهزّ كيف ما برمت. لو ما أنتوا الاثنين كنت غفيت متل غيري من زمان.

ثانيًا: أي متى بلّشتوا تحضّروا للحفلة؟ قبل بيومين؟ يلعن عرضن، ولا كأنّه عازفين مع بعض من قبل الشباب. وأنت يا زياد عارف، وعم تبهدل فيهن عالرايح والجايي. بس ما توقّعت أنّك تستعجل وتقدّم حفلة مش جاهزة لها الفرقة، أنّه عارفين منكن جاهزين لتقديم حفلة، بلاها من الأساس، وبلا سمّة هالبدن.

وبيّنت من الأول، لمّا قلنا بلّشتوا ب “يارد بيرد سويت” قلنا خلاص، الحفلة رائعة من أوّلها. وأنا شو ببالي؟ التسجيل. و يا ريتني ضلّيت عالتسجيل لأنه اللي انعزف ما خصّه ب يارد بيرد سويت اللي بعرفها من تسجيلات حفلات زياد. العازفين مش لاحقين إيقاع، عم بيعزفوها عالبطيء، إجا زياد عم بيسرّع الإيقاع قاموا فاتوا ببعض الشباب، الغيتار قطش والنفخ… يا محلا البراميل.

التقدير الوحيد بيروح لعازف الفيولين اللي كان محضّر منيح هال كم جملة اللي عنده ياهن، ولعازف البايس  اللي بيحب هالموسيقى وكان حَرِك عالمسرح، بس حماسه ضيّعه بالعزف.

يعني إذا بسادس حفلة بيعزفوها الشباب وهيك قصص صارت،وهنّي مفروض يكونوا صاروا عم يعزفوا عن غايب، شو صار بأول حفلة؟ كانوا بلّشوا يتمرّنوا وقتها؟

ثالثًا: شو كانت هدفك بالتوزيع بالضبط؟ بيغ باند؟ ولّا لاونج؟ ولّا حاسبنا بمطعم وعم تجرّب تساعدنا عالهضم؟ لأنّه إذا بيغ باند، أكيد ما ظبطت معك(وأنا مصرّ عال بيغ باند، مع أنّه ما كانت الفرقة مشكّلة تشكيلة بيغ باند، بس نص الآلات نفخ، وبيمشي حالهن أكثر شي هيك).

والموسيقى كانت كثير ميتة يا رجل، مع أنّو المقطوعات اللي اخترتها كان ممكن يكون فيها كثير حياة، وما قاصد اتفصحن عليك يا زياد، أعوذ بالله، بس أنه أنا وعم بسمع هالأغاني وشايف نص هالفرقة قاعدين لا شغلة ولا عملة، صار يخطر على بالي توزيع للأغاني بيشمل هالآلات اللي عالمسرح اللي مَنّها مشاركة، كان ممكن يكون أحلى، خاصة أنّه بيحرّك هال كم برميل اللي شطّت ريلتهن هنّي وغايفيين، هنّي وجمهور الزبالة اللي كان حاضر جسدًا بالصالة، واللي ما كان جايي يسمع موسيقى أصلًا. بس رجعت فكّرت، هل ممكن ما شرّكتهن يا يوسف لأنّك ما بدّك ينزعوها أكثر. وع قولة صديقي: “شو نحن منعرف أكثر من زياد يا زلمي؟”.

يا خيّي طيّب لاه ما بعرف أكثر من زياد. بس بعرف أنّو جايي أسمع موسيقى حلوة، وبعرف أنو بالعادة لمّا حدا يعزف بحفلة بيقدّم تحف فنيّة بتسوى كلّ الأداءات اللي مرقت من قبل، وما بيقبل ب شيء أقلّ جودة من التسجيل. بس بهالحالة، كان التسجيل القديم لهالمعزوفات أحلى من الحفلة، بكثير.

أمّا بالنسبة للجمهور، إذا بتريد المرّة الجايي وضّح للجمهور حفلة شو ناوي تعمل. بعرف أنكم مرّقتوها بمقال بالأخبار، بس بتعرف مش كل العالم فاضية تقرا مقالات طويلة، عندن سياسات دول عم بيتابعوها ويحلّلوها الجماعة. قلّهن المرّة الجايي، الله، بكلمة أو اثنين على البوستر “موسيقى أجنبية”، أو “أغاني عربية قديمة”، أو “مقاطع ومقالات سياسية”. مع أنّه كثير منحب الفواصل (المقالات) اللي بتمرق، ورجاءً حافظ عليها. بس الحفل كان معظمه موسيقى، فلو كانت العالم عارفة أكثر ما كانوا إجوا وقعدوا غصبًا عنهن بس لأنهن دافعين وقتلوا الجوّ. كانوا جايين ناطرين بيانات وتحيات. ناطرين كلمة “الجنوب”، أو “عمّال” ليصفّقوا قبل ما يرجعوا يناموا.

صديقتي كان مستنظرة حفل دمشق هي وقاعدة. قلتلها بنص الحفلة، ما بقى تحلمي، العنصر اللي خلّا حفل دمشق حلو هو الجمهور، شيء كان ناقص بالأونيسكو.

بعد في أشياء فينا ننقدها، بس خلّينا على هودي هلّأ، بما أنّو في مشاريع جايي، وبدنا نشوف ع شو ناوي.

لذلك، أنا ناطر حفل الجايي (كان في إشاعة عن حفل بالسوديكو؟) وبدّي شوف شو رح يتغيّر. ورايح ومعي بطاطا ان الله راد (مش بندورة، بطاطا)، لأنّه مظبوط الجمهور أهبل يا أستاذ زياد، بس أنا من الثانيين، وما بقبل تستهبلني. لاحظت أنّك عم تحطّ للعالم عالرايح والجايي “العقل زينة”، وفهمت شو قصدك، بس ما بضمنلك الكل يفهموها . ومظبوط ما بعرف كثير بالموسيقى، بس بعرف شو رايح اسمع، وبعرف شو قادر تعمل حضرتك. فما تنزعها المرّة الجايي يا جو.

كيفني معك؟

Advertisements
This entry was posted in Uncategorized. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s